Wat vertellt un
sammelt is
Ein Museum för Richard Wossidlo
Richard Wossidlo
An denn 26. Januor 1859 is Richard Wossidlo buren up dat Gaut Friedrichshoff, nich wiet af von dit Hus. Hei is de Grünner von de Mäkelborgsche Volkskunn. In de Kirch von Walkendörp wür hei döfft. Hei wier ein von de, wecke in de düütschen Volkskunn in dat 19. un tiedige 20. Johrhunnert de Näs vörn haren. Hei hett forscht un sammelt un up disse Oort dat bannig grote Archiv œwer de mäkelborgsche Volkskultur tausåmenbröcht. Wossidlo wür in dat 20. Johrhunnert Bås un Leit von dat mäkelborgsche Besinnen up de Heimat. De Lüd kennten, schätzten un iehrten em all tau Läwenstieden.
Dit Museum will för em ein Denkmål setten.
Volkskunn
As Richard Wossidlo geburen wier, leep de Volkskunn noch in ehre Lüttkinnerschauh. Mit de Romantik in dat tiedige 19. Johrhunnert güng dat los, dat ein in dat „Volksläwen“ nå dat Natüürliche, denn Ursprung un dat Authentische söcht hett. Dat „Volk“ stünn ok för de Idee von de düütsche Natschon. De Volkskunn entstünn as Wätenschaft. Besünners siet de Midd von dat 19. Johrhunnert hett ein allens sammelt, wat olt wier, denn dat estemierte ein as wiertvull. So güng dat mit de Språk von dat Volk un allens, wat bi dat Volk Bruk wier, so as ok mit all Objekten von de Volkskultur. Twüschen de beiden Weltkriege wür de Volkskunn denn tau ein eigen Disziplin an de Universität.
