Ein Läwen mank Dåchlöhners un Perfessers
De Bœrgersœhn von ein’ mäkelbörger Gautsbesitter stüerte all in jungen Johren nå de Welt von de Wätenschaft. Hei studierte klassisch’ Språkenkunn, wür Lihrer an dat Gymnåsium un entdeckte för sik de plattdüütsche Språk un Volkskultur. Siet de Tiet wier sien Läwen fast verbunnen mit dat Feldforschen, Sammeln un Archivieren von Plattdüütsch, denn Språkenschatz in siene Heimat.
Kinnertiet – Friedrichshoff un Walkendörp
Von dat Gaut Friedrichshoff – blot poor Kilometers af von Walkendörp – is hüt nix mihr œwerbläwen un tau seihn. An denn 26. Januor 1859 is Richard Carl Theodor August Wossidlo dor buurn un lütt bäten låter in de Kirch Walkendörp döfft.
Schaultiet – Bützow, Korten-Trechow un Rostock
Richard Wossidlo siene Schaultiet güng in de Reålschaul von Bützow los. Besünners wier tau de Tiet, dat hei ümmer mål wedder up dat Gaut von sienen Grotvadder Kohrt in Korten-Trechow up Besäuk wier. Dat hett sik fastsett: Dörch dat Landläwen un de Begägnungen mit de Dåchlöhners up dat Gaut füng hei an, sik mit de plattdüütsch Språk tau befåten.
Studententiet – Rostock, Leipzig un Berlin
De Klassisch’ Språkenkunn wür tau dat Studienfack von Richard Wossidlo. Hei studierte sœben Johren, von 1876 bet 1882, in Rostock, Leipzig un Berlin. Latiensch un besünners de olle Griechisch’ Språk un Kultur tögen denn jungschen Studenten an. Liekers hett hei siene Dissertatschon afbråken, åwer hett in Rostock ein’ Schaulschien krägen, dat hei an dat Gymnåsium de beiden ollen Språken ünnerrichten dörft.
As Schaulmeister
Tauierst in Wismer un denn 1886 von Ostern an in Woren wier Richard Wossidlo Lihrer för Latiensch un Griechisch an de Gymnåsien dor. 36 Johren hett hei Kinner wat bibröcht, wat em sülben väl Freud måkt hett.
Besünner Såken sammeln
In siene Studientiet hett Richard Wossidlo sik alltiets mit nedderdüütsche Schriewerslüd befått. Hei füng dunn an, plattdüütsche Wür ut de Texten ruttaufinnen. Besünner Wür un Såken („notabilia“) hett hei ünnersträken un dat up Zeddels exerpiert. Wossidlo siene Sammelie har anfungen.
Wandern un sammeln / Feldforschen
Anners as anner, de sik mit Volkskunn beföten, hett Richard Wossidlo siene Gewährslüd sülben un persönlich besöcht. Hei hett dat nich so as anner måkt, wecke Dörpschaullihrers as Bidrägers blot von de Fiern middels Breiwen utfråcht hebben. Hei wull de Lüd tau’t Schnacken bringen, so dat sei vertellen, worup sei sik besünnen un wat Traditschonen wieren. Wat dorbi rutsuerte, kunn hei nich in vörformulierte Frågen plånen. Wossidlo hett bi dat Utfrågen so siene Kniffs hatt. Dat wier besünners klauk un so wür hei tau einen, wecker dat moderne Feldforschen in de Volkskunn vöran bröcht hett.
Plietsche Laien as „Bidrägers“
Twüschen siene Sammelreisen hett Richard Wossidlo ok Lüd in Breiwen utfråcht, so as dat in de Volkskunn von disse Tiet begäng’ wier. Von Bedüdung wieren dorbi Middelslüd, ofteins Dörpschaullihrers un Pasters, de sik mit Richard Wossidlo von Tiet tau Tiet Breiwen schräwen. Dat güng ofteins fidel hen un her. De Middelslüd würden nich blot slicht utfråcht, sünnern dat geef ’ne würklich echte Kommunikatschon.
