Sammler, Forscher, Volks-Perfesser
De Forscher tellte tau de bekanntesten Lüd in Mäkelborg, båbentau har hei de Erfolg in de Wätenschaft. Siene upschräwen Ideen befüerten de Heimatbewägung in dat tiedige 20. Johrhunnert, wat ok de Natschonålsozialisten gewohr würn un wat ehr interessieren ded. De Mäkelbörger leiften ehren „Volsperfesser Vosslo“.
Ein gelihrten Sammler
Richard Wossidlo meinte tietläwens von sik, dat hei mihr Sammler as Mann von de Wätenschaft wier. Åwer sien System, Quellen aftauleggen un dat hei sik ümmer mank Språkforschen un de Volkskunn un disse Ideen in siene Tiet bewägen ded, måkten em liekers tau einen Verträder von de wätenschaftlich’ Volkskunn. Hei bleef sien Läwdach „Privåtgelihrter“ åhn Lihrstauhl an de Universität, mösst sik åwer ok nich ünner anner Lüd ehr Entscheidungen verbögen.
Sågen – Ut mythisch’ olle Tieden trüchbläwen?
Üm un bi 34.000 Sågen un ehre Varianten ut Mäkelborg hett Richard Wossidlo sammelt. Tau disse Tiet glööfte ein, dat disse Texten up denn Glowen von ihrgistern Kulturen un Völkers trüchgåhn – in denn gröttsten Part von Düütschland up de Germånen un jüst in Mäkelborg up de Slåwen. Nå de „Urformen“ wür forscht un söcht. Wossidlo, de süssen as Forscher einen kloren Kopp harr, vertüderte sik ok in disse Thesen, de in siene Tiet as Wätenschaft gellen deden.
De Heimat-Bewägung
De Stadtlüd lengte dat nå ein Landläwen, wat sei sik hårmonisch un ideål vörstellen deden. An de Kiehr von dat 19. tau dat 20. Johrhunnert grünnten sik œwerall in Düütschland Heimat-Vereins. De Vereinsmåten forschten de Volkskultur ut un pläächten dat, wat ehr as bannig oll Brukdom vörkeem. Sei bröchten dor nieget Läwen rin un danzten olle Volksdänz. Richard Wossidlo hett väl dortau bidrågen un disse Ideen in Mäkelborg vöranbröcht.
Ünner de Håkenkrüz-Fåhn
Siene låten Johren von 1933 bet 1939 verlääfte de olt worden Sammler un Forscher in de Tiet von denn Natschonålsozialismus. Hei wier nich in de NSDAP un hei hett sik nich åpen för de un wat de wullen utspråken.
De Forscher mit Erfolg
Richard Wossidlo hett Glück hatt un hüürte tau de Forschers, de ehren Erfolg in de Wätenschaft noch belääft hebben. As Privåtgelihrten wier hei frie un kunn sien eigen Interessen in de Wätenschaft någåhn.
